Нийслэлийн Засаг даргын орлогч О.Номинчимэг өнөөдөр Төв цэнгэлдэхийн газрын маргааны асуудлаар мэдээлэл өглөө. Тэрбээр энэ үеэрээ "Төв цэнгэлдэх хүрээлэнг анх 1993 онд өмч хувьчлалаар ягаан тасалбараар хувьчилсан. Тэр үед 30 хувь нь хувийн эзэмшилд очиж, 70 хувь нь нийслэлийн өмчид үлдсэн. Улмаар 2003 онд иргэн Т.Нямдаваа 30 хувиа 49 хувь болгож, нийслэлийн хувь эзэмшил 51 болсон. Энэ ердөө 400 мянган төгрөгийн асуудлаас болж, зөвхөн ТУЗ-ийн шийдвэрээр 49 хувиа 51 хувь болгож өмчилсөн байдаг. НИТХ-аар хэлэлцүүлээгүй.
Төв цэнгэлдэх хүрээлэнгийн газар 2005 оноос хойш 29 салж, 12.6 га үлдсэн. 3 дахин багассан гэсэн үг. Энэ бол газрыг нь зарж идсэн л асуудал гэж харж байна.
Одоо Төв цэнгэлдэхийн баруун талд "Мөнх сан" ХХК-ийн эзэмшил барилга баригдаж байна. Төв цэнгэлдэх хүрээлэнгийн 51 хувийг эзэмшигч Т.Нямдаваагийн хүүхдийн компанийнх. Өөрсдөдөө газраа хувьчилж авч, өндөр барилга барьж байна. Энэ газар дээрээ анх орон сууцны зориулалттай барилга барина гэчихээд үйлчилгээ, бар сав байгуулна гээд байдаг.
Үүнийг авилга хороолол гэдэг шиг би бол "Шунал" хороолол гэж нэрлэмээр байна. Газрын зориулаллтын дагуу ашиглаж байна уу, хугацаандаа хийж үү гэдгийг шалгаад энэ барилгыг зогсооно гэсэн бодолтой байна" хэмээлээ.
