Зудын нөхцөл байдлаас үүдэн 2,1 сая тоо толгой мал зүй бусаар хорогдоод байна. Зүй бусаар хорогдсон малын сэг зэмийг устгах цэгийн судалгааг холбогдох газруудаас гаргажээ. Ийнхүү 335 сум, дүүрэгт 1336 устгалын цэгийг байгуулсан байна.
Сэг зэм устгалын ажилд мал эмнэлгийн 436 мэргэжилтэн, үйлчилгээний нэгжийн 1244 малын эмч, аймаг сум Засаг даргын тамгын газруудаас 1761 туслах ажилтан ажиллах юм байна. Дээрээс нь цэрэг, цагдаагийн 3221 ажилтныг татан оролцуулахаар төлөвлөсөн аж. Сэг зэм устгалын ажилд 6004 хүн ажлуулахаар төлөвлөжээ.
Монгол орны хувьд шатааж хөрсөнд булшлах, шууд булшлах аргыг хэрэглэж байгаа. Цөөн сэг зэм байвал шатаах аргыг хэрэглэх боломжтой. Харин их хэмжээгээр сэг зэм гарсан тохиолдолд энэ арга тохиромжтой биш. Гоц халдварт зооноз өвчин гарсан үед бол тусгай зааврын устгал дагуу хийдэг. Энэ удаад малын сэг зэмийг булшлах аргаар устгалд оруулах юм байна.
