ГАМШГИЙН ӨНДӨРЖҮҮЛСЭН БЭЛЭН БАЙДЛЫГ ЦУЦЛАХ ХҮРТЭЛ 321 РЕЗИДЕНТ ЭМЧИЙГ ОРОН НУТГИЙН ЭРҮҮЛ МЭНДИЙН ГАЗРЫН МЭДЭЛД АЖЛУУЛНА

Эрүүл мэндийн сайдын шийдвэрээр, Зудын нөхцөлд байгаа орон нутгийн иргэдэд тусламж үйлчилгээ үзүүлэх зорилгоор 321 резидент эмчийг гамшгийн өндөржүүлсэн бэлэн байдлыг цуцлах хүртэлх хугацаанд орон нутгийн эрүүл мэндийн газрын мэдэлд ажлуулахаар болжээ. Тодруулбал аймгийнхаа эрүүл мэндийн газарт очиж, зудын эрсдэлд эрүүл мэндийн ажилтан дутагдалтай байгаа сумдад хуваарилагдан ажиллах юм байна.

Улсын хэмжээнд зайлшгүй шаардлагатай эм, эмнэлгийн хэрэгсэл гурав хүртэлх сарын нөөцтэй байна. Тасарсан эм, тариа байхгүй аж.

Хүндрэл гарч буй нэг асуудал нь туулах чадвар сайтай эмнэлгийн тээврийн хэрэгсэл. 2023 оны арванхоёрдугаар сард 11 аймгийн 20 суманд түргэн тусламжийн автомашин нийлүүлсэн. Одоо дахин 60 автомашин хуваарилах шийдвэр гарчээ.

"2024 оны хоёрдугаар сарын 26-ны өдрийн байдлаар 21 аймгийн хэмжээнд 68,361 иргэн эрүүл мэндийн тусламж үйлчилгээнд хамрагдсан байна. Үүнээс

• жирэмсэн эх 2,129,
• 0-5 насны хүүхэд 8,012,
• өндөр настан 13,544,
• хөгжлийн бэрхшээлтэй 4,705,
• архаг суурь өвчтэй 11,650 иргэнд эмнэлгийн тусламж үйлчилгээ үзүүлсэн.

Нийт 3500 өрхөд эмийн багцийг хүргэсэн. Эрүүл мэндийн салбарын долоон шуурхай баг 4-5 мэргэжлийн эмчтэй ажиллаж байна.