ӨМНӨД СОЛОНГОСТ ГАДААД ОЮУТНЫ ЭЦЭГ ЭХЧҮҮДЭД АЖЛЫН ВИЗ ОЛГОХ ТУРШИЛТЫН ХӨТӨЛБӨРИЙГ ЭХЛҮҮЛЭХЭЭР БОЛЖЭЭ

Өмнөд Солонгосын засгийн газар гадаад оюутнуудын эцэг эхчүүдэд сургуулийнх нь ойролцоо хөдөө аж ахуй, загасны аж ахуйд ажил хөдөлмөр эрхлэхийг зөвшөөрөх туршилтын хөтөлбөр эхлүүлэх гэж байгаа аж.

Хөтөлбөрт хамрагдах оюутнуудад тавигдах гол шалгуур нөхцөл нь 

• Сөүл хотоос гадна орших сургуульд нэг жилээс дээш хугацаанд суралцсан байх, 
• Эцэг эх нь хүүхдийнхээ сургууль оршдог бүс нутагт найм хүртэл сарын хугацаанд улирлын чанартай ажил эрхлэх боломжтой байх 
• Оюутны эцэг эхчүүд 55 хүртэл настай, эрүүл мэндийн асуудалгүй, гэмт хэрэгт холбогдож байгаагүй байх 
• Оуютан Солонгосын хуулийг зөрчиж байсан түүхгүй байх
• Төгсөх хүртэл хоёроос дээш семестрийн сургалт үлдсэн байх

Туршилтын хөтөлбөр энэ оныг дуустал үргэлжлэх юм байна. Харин хэлний сургалтад хамрагдаж буй гадаад оюутнууд энэ хөтөлбөрт хамрагдахгүй гэнэ.

Өмнөд Солонгосын эрх баригчид өмнө нь тус улсын иргэнтэй гэр бүл болсон гадаадын иргэдийн ар гэрийнхэнд ажил эрхлэх зөвшөөрөл олгох хөтөлбөр хэрэгжүүлсэн нь сайн үр дүнтэй болсон тул оюутнуудын эцэг эхчүүдэд энэ хөтөлбөрөө өргөжүүлэхээр болжээ.