БОАЖЯ-наас 2024 оныг “ОЙН ЖИЛ” болгон зарласан. Мөн “Тэрбум мод” Үндэсний хөдөлгөөн, “Алсын хараа-2050” Монгол Улсын урт хугацааны хөгжлийн бодлогод “Ойгоор бүрхэгдсэн талбайн хэмжээг 2030 онд 9.0 хувьд хүргэх” зорилт тавиад байгаа.
Тэгвэл Монгол улсын Ерөнхийлөгчийн санаачлагаар Ойн салбарын II чуулганыг “ОЙ 9+” уриан дор 2024 оны 03 дугаар сарын 05-ний өдөр зохион байгуулах гэж байна.
Чуулганыг Төрийн ордны их танхимд зохион байгуулах бөгөөд нийслэл, 21 аймгийн тамгын газар, ойн ангиуд, мэргэжлийн байгууллагууд, ойн салбарын төрийн бус байгууллагууд, элчин сайдын яамд, олон улсын хамтрагч байгууллагууд, хөгжлийн түнш байгууллагууд, төсөл хөтөлбөр, үе үеийн ойчдын төлөөллөөс бүрдсэн олон талын оролцоог хангасан байдлаар зохион байгуулах аж.
Чуулганаар Монгол орны ойн өнөөгийн байдал, тулгамдаж буй асуудлууд, шийдэл, өөрчлөлт шинэчлэлт, олон улсын хамтын ажиллагаа, хөрөнгө оруулалт, “Тэрбум мод” Үндэсний хөдөлгөөнийн хэрэгжилт, хүрсэн үр дүн ба цаашид хэрэгжүүлэх арга хэмжээ зэрэг олон чиглэлийн асуудлыг зохион байгуулагч талууд, оролцогчид хамтдаа нээлттэй хэлэлцэж, зөвлөмж гаргах юм.
