Монгол орны нийт газар нутгийн 80 хувь нь цасан бүрхүүлтэй, 92 суманд нөхцөл байдал хүнд, 90 суманд цагаан зуд, 23 суманд төмөр буюу шилэн зудын байдалтай байна. Түүнчлэн 12 аймгийн 200 суманд зам гарц хаагдсан, 3137 малчин айл өрхтэй холбоо тогтоож чадаагүй байгаа аж.
Мөн малын зүй бус хоргодол нэмэгдэж өнөөдрийн байдлаар 1.527.695 болжээ.
Эдгээр малын мах дэлгүүрийн лангуунд худалдаалагдах вий гэсэн болгоомжлол хэн бүхэнд үүсч байгаа. Тэгвэл Шадар сайд С.Амарсайхан өнөөдөр сэтгүүлчдэд мэдээлэл өгөх үеэрээ "Зуд зовлонгийн хажуугаар ашиг хонжоо хайсан янз бүрийн үйлдэл гарахыг үгүйсгэхгүй. Гэхдээ зудаар үхсэн малын хаягдал махыг хоол хүнсэнд хэрэглэгдэх асуудал боломж байхгүй гэдэгт итгэлтэй байж болно. Хууль хяналт, мэргэжлийн байгууллагууд тус асуудалд онцгой хяналт тавьж ажиллаж байгаа.
Хэрэв зарах юм бол нийгмийн эрүүл мэндийн эсрэг гэмт хэрэгт тооцогдоно. Хуулийн дагуу эрүүгийн хариуцлага хүлээнэ.
Зудад хорогдоод буй мал дулаарахаар халдварт өвчин бий болгох эрсдэлтэй. Үүнийг гаргахгүй байхын тулд зэвсэгт хүчний хүн, машин техникийн нэмэгдүүлж малыг газар булж устгана. Дараа нь ариутгал халдваргүйжүүлэлтийн ажил гүйцэтгэнэ" хэмээлээ.
Сануулахад, одоогоор орон нутгийн арваад аймагт малын цэцэг, мялзан өвчин гарч халдвар тархах эрсдэл үүсээд байгаа. Иймд малын сэг зэмийг яаралтай цэвэрлэх, халдваргүйжүүлэлт хийх шаардлагатай аж.
