2023 оны байдлаар банкны системээс 27.1 их наяд төгрөгийн зээл олгосон байна. Үүний 1.2 их наяд төгрөг нь малчдын авсан зээл юм. Монгол Улсад 12 банк үйл ажиллагаа явуулдгаас тав нь л малчдад зээл олгож байна. Үүний 51% буюу 618 тэрбум төгрөгийн зээлийг Төрийн банкнаас, 48% буюу 585 тэрбум төгрөгийн зээлийг Хаан банкнаас, үлдсэн нэг хувийг Капитрон, Голомт, Чингис хаан гэх гурван банкнаас олгожээ. Тухайлбал 81164 малчин өрх Хаан банкинд зээлтэй байгаа бөгөөд тэдний нийт 159.4 тэрбум төгрөгийн малчны зээл даатгагдсан аж.
Малчид харьяа орон нутгийнхаа Хаан банк болон Төрийн банкны салбарт хүсэлтээ цахимаар гаргаж, шийдүүлэх боломжтой юм байна.
Малчдын зээлийн эргэн төлөлтийн хойшлуулах энэхүү зөвшилцлийн үеэр “Үндэсний давхар даатгал” ХК-ийн зүгээс “Энэ оны 9-10 дугаар сарын хооронд малчдын даатгуулсан малын индексжүүлсэн даатгалын нөхөн төлбөрийг олгоно. Энэ оны гуравдугаар улирал хүртэл малчдын зээл төлөлт хойшлогдвол тэр үеэр бид даатгалын нөхөн төлбөр олгож таарах учраас эргээд малчид банкны зээл төлөлтөө хийхээр илүү дөхөм болно” гэлээ
