Ховд аймгийн нэр бүхий сэтгүүлч цаг агаарын нөхцөл байдал тааруу, хаваржилт хүнд болж байхад хурдан морины уралдаан зохион байгуулж байна гэх утгатай мэдээлэл цацсан байдаг.
Тодруулбал, тэрбээр "Цасаар шуурч, зам даваа хаагдахад хүрч, цаг агаар хүнд байхад бандгар уяачид энэ сарын 17-ны өдөр Эрдэнэбүрэн суманд хурдан морьдын уралдаан зохион байгуулж наадсан байх юм. Засгийн газрын тогтоолыг зөрчиж, мөн хүүхдийн амь нас, эрүүл мэндэд аюул учруулах тоглоом наадам зохион байгуулсан уяачдад хэн ямар хариуцлага тооцох вэ. Уг асуудлыг хүүхэдтэй ажилладаг байгууллагууд шалгана уу" гэжээ.
Энэ талаар цагдаагийн байгууллагаас тодруулахад "Энэ зөрчлийг 18-ны өдөр бүртгэлд оруулж шалгаад Зөрчил шалган шийдвэрлэх тухай хуульд зааснаар харьяаллын дагуу аймгийн Гэр бүл, хүүхдийн хөгжлийн газарт шилжүүлсэн" гэв.
2019 оны нэгдүгээр сарын 30-ны өдөр, Засгийн Газрын 57-р тогтоол гарч, энэ үеэс эхлэн жил бүрийн арван нэгдүгээр сарын 01-ний өдрөөс тавдугаар сарын 01-ний өдрийг хүртэлх хугацаанд хурдан морины уралдаан зохион байгуулахыг хориглосон.
Гэвч морь сонирхогчид хийгээд уяачид тус тогтоолыг зөрчин нууцаар сунгаа, үсэргээ, хурдан морины уралдаан зохион байгуулдаг гэх мэдээлэл олон нийтийн дунд бий. Тэгвэл асуудлын мөрөөр цагдаагийн байгууллага шалгаж, зөрчил илрүүлж, харъяаллын дагуу шилжүүлж ажиллажээ.
