Улс орон даяар цас, зудын байдалтай байгаа энэ үед “Малчдад туслая” аяны хүрээнд Мал эмнэлгийн хүрээлэнгийн эрдэмтэн судлаачдын баг орон нутгийг зорилоо. Тэд малчид, малын эмч нарт зудын эрсдэлийг хүндрэл багатай даван туулахад шинжлэх ухааны үндэслэлтэй мэргэжлийн зөвлөгөө, мэдээлэл өгөх, инновацын бүтээгдэхүүний тусламж хүргэх юм байна.
Монгол Улс бэлчээрийн мал ахуйтай. Малчид жилийн дөрвөн улирлын турш өвсний сорыг харж, малаа даган нүүдэллэж амьдардаг. Жилийн жилд цас зудны аюулыг тэд өөрсдийнхөө арга ухаан, амьдралын туршлагаараа даван гарч, төрөөс өвс тэжээл болон бусад төрлийн дэмжлэгүүдийг үзүүлсээр ирсэн. Харин энэ жилийн тухайд сүүлийн 49 жил тохиогоогүй их цас зуд нөмөрч хүн малгүй сөхрүүлж байхад хотод паартай байшин, паалантай жорлонд суугаа олон иргэд малчдыг шүүмжилж, ажилгүй анхиагүй хэмээн цоллох дүр зураг сүүлийн өдрүүдэд цахим орчинд багагүй харагдах болсон.
Тэгвэл энэ удаад бүр эрдэмтэн судлаачид очиж мэргэжлийн зөвлөгөө өгөхөөр хөдөөг зорьсон нь энэ.
Орон нутагт ажиллах эрдэмтэн судлаачдын багт Эмгэг судлалын лабораторийн эрдэм шинжилгээний ажилтан, доктор Б.Мөнгөн-Очир, Бодис солилцоо биохимийн лабораторийн эрдэм шинжилгээний ажилтан, доктор Д.Будрагчаа, Төлийн физиологи, эмгэг судлалын лабораторийн эрдэм шинжилгээний ажилтан Л.Цогтбаатар, жолооч Б.Отгонбаяр нар нэгдэж төвийн бүсийн аймгуудад ажиллах мэдээлэл бий. Чухамдаа тэдний онол бодит нөхцөл байдалд хэрхэн бууж, үр дүнд хүрэх нь олон нийтэд хүлээлт үүсгэхээр байна.
