Хахир хавар аашаа харуулж хөдөөний хэдэн малчдыг малтай нь хамт сөхрүүлсэн өдрүүд өнгөрч байна. Үүн дээр зарим хүмүүс тоглолт хийж сайны дүртэй харагдах гэж мэрийж байгаа бол зарим нь хээв нэг дэлгэцийн цаанаас сагсалзах аж. Тэгвэл энэ удаад УИХ-ын гишүүн Ж.Бат-Эрдэнэ дулаан, тухтай газар машинаа угаалгах зуураа өөрийн бодлоо цахим хуудастаа тэрлэжээ. Зуд дахиад ч болно. Тэр бүрт бид гүйж очсоор л байх уу хэмээн ам асуух түүний байр суурийг танд хүргэе.
УИХ-ЫН ГИШҮҮН Ж.БАТ-ЭРДЭНЭ:
-Үнэхээр энэ өвөл, хавар хүндхэн болж байна. Гэхдээ Монгол нутагт болдог л өвөл хавар шүү. Гэнэтийн мэт сандралдах юун. Энэ удаад би жаахан хатуухан хандаж байгаа. Мал аж ахуйдаа шинэчлэл хийх, малчдаа дэмжих, хагас суурин маллагаатай болгох гээд Шинэ хөдөө хөтөлбөр энэ тэр гээд зөндөө санал санаачлага гарган ажиллаж байгаа. Үүнийг ойлгож дэмжсэн нь хэд вэ. Малчдаа дэмжих гэхээр хэдэн малчдаа давраалаа. Мал гэдэг малчны хувийн өмч. Зах зээл өөрөө бүхнийг зохицуулна гэдэг хүмүүс өнөөдөр таван боодол өвс бариад малчидлаа хайр зарлаад гүйж байх шиг. Зуд дахиад ч болно. Тэр бүрт бид гүйж очсоор л байх уу. Мал аж ахуйг шинэчлэх гэхээр малын ээмэг ярьдаг сайд, яамтай улс шүү дээ бид чинь. Аль болгон нэг зуднаар хамгаа бардаг МАА-тай байх вээ. МАА-гаа шинэчлэх, малчдаа дэмжих цаг нь болсон. Хэдэн малчдын асуудал яриад байгаа зүйл огтхон ч биш. Үүний цаана хүнсний хангамж, хүнсний аюулгүй байдал, мал аж ахуй гэсэн ЭЗ-н томоохон салбарын асуудал яригдана. Сайн хөгжүүлж шинэчилж чадвал дэлхийн зах зээлд тоглогч ч болох боломжтой. Томоор харж хөгжилтэйгээ хөл нийлүүлж шинэчлэх цаг нь болсон бус уу. Нүүдлийн мал аж ахуй л гэнэ. Нүүдлийн соёл иргэншил л гэнэ. Мал дагаж нүүж амьдрах нь чухал уу. Нүүдлийнх гээд задгай малтайгаа цас шуурганд уруудаад амь насаараа дэнчин тавьж эрсдэж амьдрах нь чухал уу. Эсвэл малаа эргэлтэд оруулж ашиг олж амьдрах нь чухал уу. Малынхаа өвчнөөс салж, мал махаа экспортод гаргаж малчдаа хөл дээр нь босговол хэдэн малчид маань төрөөс харалгүй өөрсдөө хэдэн хашаа саравчаа барьчих байхаа.
