Нийслэл хот 2024 оны төсвөө өнгөрөгч оны 12 дугаар сард баталсан. Гэвч 2 сар хүрэхгүй хугацааны дараа төсөв тодотгол оруулахаар болж өчигдөр /02.15/ Нийслэлийн засаг дарга бөгөөд захирагч Х.Нямбаатар НИТХ-ын дарга Ж.Батбаясгаланд Нийслэлийн 2024 оны төсөвт өөрчлөлт оруулах тухай тогтоолын төслийг өргөн барьсан.
Үүний гол шалтгаан нь МУ-ын Засгийн газраас шийдвэр гарч Монгол Улс их оврын тээвэр буюу метрог өөрийн төсвөөрөө барьж байгуулахаар болсонтой холбоотой юм байна.
2024 оны төсвийг батлахад үүн дээр тодорхой шийдвэр гараагүй байсан учраас тооцоолж оруулаагүй байсан аж.
Гэвч энэ жилдээ метроны ажлыг эхлүүлэхээр төлөвлөсөн учир 2024 оны нийслэлийн төсвийг тодотгон метроны төслийн гүйцэтгэгч контрактрыг авах хөрөнгө оруулалтын төсвөө суулгажээ.
Үүнээс гадна улсын төсвөөр шийдвэрлэж чадаагүй хэд хэдэн асуудлууд байсан. Тодруулбал, Гандангийн сургууль, 29-р сургуулийн засварын асуудлыг яаралтай шийдвэрлэх, сургууль цэцэрлэгийн хүртээмжийг нэмэгдүүлэх шаардлага үүссэн учир эдгээрийг ч мөн төсвийн тодотголд тусгажээ.
Төсвийн тодотголд сургууль цэцэрлэгийн хүртээмжийг нэмэгдүүлэх, чанарыг сайжруулах чиглэлд 11 ажлыг төлөвлөн 26,3 тэрбум төгрөгийг нэмж тусгасан байна.
