Нийслэлийн прокурорын газраас Нийслэлийн Засаг даргын тамгын газрын Нийтлэг үйлчилгээний газрын дарга Х.Э, ерөнхий нягтлан бодогч Х.Ц нар нь эрх мэдэл, албан тушаалын байдлаа урвуулан нэр бүхий компаниудтай “Бэлтгэн нийлүүлэх” гэрээ байгуулж давуу байдал бий болгосны хариуд хахууль авсан, мөнгө угаасан гэх хэргийг шүүхэд шилжүүлжээ.
Тодруулбал, Эрүүгийн хуулийн 22.1 дүгээр зүйлийн 2 /Эрх мэдэл, албан тушаалын байдлаа урвуулан ашиглах/, 22.4 дүгээр зүйлийн 4 /Нийтийн албан тушаалтан хахууль авах/, 22.5 дугаар зүйлийн 2 /Хахууль өгөх/, 18.6 дугаар зүйлийн 2.3 /Мөнгө угаах/-т зааснаар яллах дүгнэлт үйлдэн Баянзүрх дүүргийн эрүүгийн хэргийг анхан шатны шүүхэд шилжүүлсэн байна.
УЛСАД ХАГАС ТЭРБУМ ТӨГРӨГИЙН ХОХИРОЛ УЧРУУЛСАН ГЭХ ХЭРЭГ
2022 онд Нийслэлийн Нийтлэг үйлчилгээний газар (ННҮГ)-ын даргаар ажиллаж байсан Ш.Одончимэг, ерөнхий нягтлан бодогч асан Д.Энхжаргал нарт холбогдох “Эрх мэдэл албан тушаалын байдлаа урвуулан ашиглаж, нийслэлийн Нийтлэг үйлчилгээний газарт хагас тэрбум төгрөгийн хохирол учруулж, өөртөө болон бусдад давуу байдал бий болгосон хэрэг”-гийг Чингэлтэй дүүргийн Эрүүгийн хэргийн анхан шатны шүүх хэлэлцэж, шийдвэрээ гаргасан байдаг.
Шүүгдэгч Ш.Одончимэг нь Нийслэлийн Нийтлэг үйлчилгээний газрын даргаар ажиллаж байхдаа буюу 2012 оны тавдугаар сарын 03-ны өдрөөс 2017 оны аравдугаар сарын 18-ны өдрийг хүртэлх хугацаанд тус газрын ерөнхий нягтлан бодогчоор ажиллаж байсан Д.Энхжаргалтай бүлэглэн үргэлжилсэн үйлдлээр бүрэн эрх, албан тушаалын байдлаа урвуулан ашигласан нь баримтаар тогтоогдсон. Өөрөөр хэлбэл, Нийслэлийн Нийтлэг үйлчилгээний газар (ННҮГ)-ын даргаар ажиллаж байсан Ш.Одончимэг нь ерөнхий нягтлан бодогч асан Д.Энхжаргал нар нь бүлэглэн үргэлжилсэн үйлдлээр нийт 562 сая 994 мянга 706 төгрөгийн буюу их хэмжээний хохирлыг Нийслэлийн нийтлэг үйлчилгээний газарт учруулж, өөртөө, бусдад давуу байдал бий болгосон байжээ.
