Улаанбаатар хотын хэмжээнд 24 хорооны 33 байршилд болон нийслэлийн үерийн инженер хангамжийн байгууламж, Сэлбэ гол дагуу халиа тошин үүссэн байдалтай байна. Энэ нь өнгөрсөн оны 7,8-р сард гэнэтийн, ус ихтэй аадар борооны давтамж их байснаас Сэлбэ гол дагуу үер буусан, 9-р сард олон жилийн дунджаас 1-1.5 дахин их хур тунадас орсон, 11,12 саруудад олон жилийн дунджаас 2-3 дахин их цас орсонтой холбоотой юм байна. Одоогийн байдлаар Улаанбаатар хотод 17-19 см цасан бүрхүүл тогтсон бөгөөд цаашид шар усны үер буух нөхцөл байдал үүсч болзошгүй болоод байна.
Энэхүү нөхцөл байдалтай холбогдуулаад холбогдох албаны 284 ажилтан албан хаагч, 48 техник хэрэгсэлтэйгээр гар аргаар болон машин механизмын тусламжтайгаар 8460 м гаруй суваг шуудуу татах, 400 гаруй тонн мөсийг гаргаж тээвэрлэх, далан босгох ажлыг зохион байгуулсан байна. Халиа тошингийн улмаас есөн айл хашаандаа байх боломжгүй нөхцөл байдалтай болсноос долоон айл нь өөрсдөө нүүж 2 айлыг онцгой байдлын байгууллагаас нүүлгэжээ.
Үүссэн нөхцөл байдалтай холбогдуулан Нийслэлийн онцгой комиссоос гамшгийн шат түвшинг тогтоолоо. Мөн халиа тошинд өртсөн айл өрхүүдийн аюулгүй байдлыг хангах, мөсийг зөөж тээвэрлэх, түр далан босгох, суваг шуудуу татах, тог хаягдлыг цэвэрлэн ус чөлөөтэй нэвтрэх боломжийг бүрдүүлэх, үерийн хамгаалалтын барилга байгууламжийн найдвартай ажиллагааг ханган ажиллаж байна.
