Монгол Улсын Ерөнхийлөгч Ухнаагийн Хүрэлсүхийн урилгаар ХБНГУ-ын Ерөнхийлөгч Франк-Вальтер Штайнмайэр Монгол Улсад 2024 оны 02 дугаар сарын 7-8-ны өдрүүдэд төрийн айлчлал хийж байна. Айлчлалын хүрээнд иж бүрэн түншлэлийн харилцаатай байсан хоёр орны харилцааны түвшнийг шат ахиулж, Стратегийн түншлэлийн түвшинд хүргэсэн.
Монгол, Герман улс 2022 онд хөгжлийн бодлогоо дахин шинээр тодорхойлсон байдаг. Энэ дагуу Монгол Улс, Холбооны Бүгд Найрамдах Герман Улсын Засгийн газар хоорондын хөгжлийн хамтын ажиллагааны хэлэлцээ өнгөрөгч 2023 оны есдүгээр сард Улаанбаатар хотноо болсон.
Энэ үеэр ХБНГУ-ын Засгийн газраас Монгол Улсын Засгийн газарт хоёр талт хамтын ажиллагааны хэлэлцээний түүхэнд хамгийн өндөр буюу 78 сая еврогийн санхүүжилт олгохоор тохиролцсон билээ. Энэхүү 78 сая еврог тогтвортой эдийн засгийн хөгжил, боловсрол, эрчим хүч болон уур амьсгалын чиглэлд зарцуулж, хамтарч ажиллахаар болсон аж.
