Монголчууд эртнээс нааш бусад ард түмний нэгэн адил жилийн тодорхой мөчлөгт он солигдох ёслолыг үйлдэж ирсэн уламжлалтай. Өдгөө бидний “Цагаан сар” хэмээн нэрлэдэг Монголчуудын он солигдохыг бэлгэдсэн төрт ёсны уламжлалт баярыг Хүннү гүрний үед ч тэмдэглэж байсан тухай сурвалжийн мэдээ байдаг.
Монголчууд цагаан сарыг шидрүү өвлийг давж, урин хавартай учирсны баяр, шинэ бүхний эхлэл, сайн сайхан аз жаргал авчрагч баяр гэж үздэг
1911 онд Монголчууд тусгаар тогтнолоо сэргээж Богд хааны зарлигаар Төгсбуянтын шинэ зурхайг улсын цаг тоолол болгон хэрэглэж цагаан сарыг тэмдэглэж байв. Түүнчлэн 1913 оноос “Зарлигаар тогтоосон Монгол улсын хууль зүйлийн бичиг”-т төрийн шинэлэх цагаалах ёслолыг явуулах дэг ёсыг нарийн тусгаж өгсний дагуу төрийн ёслол болгон үйлдэж эхэлсэн түүхтэй.
Магадгүй энэ үеэс ч юм уу битүүний урд өдрийг “Тоос гөвдөг” өдөр болгон, тэр өдөр өмнөх жилийнхээ хамаг муу бүхнийг үлдэн хөөж байна хэмээн сэтгээд, гэр орныхоо бүхий л өнцөг буланг нэг бүрчлэн цэвэрлэж, хивс, дэвсгэрээ гарган гөвж, цэвэр цэмцгэр гэр орондоо сайн сайхныг урин дуудахыг билгэдэн их цэвэрлэгээ хийдэг уламжлалтай.
Үүнд гэрийн бүх хүн боломжоороо оролцож, хүүхдүүдэд насанд нь тохирсон тоос арчих, хог шүүрдэх гэх мэт ажил оноодог бол эзэгтэй нар гэрээ цэвэрлэж, айл гэрийн эзэд эвдэрсэрсэн, санжсан зүйлсээ энэ өдөртөө багтаан засаж янзалдаг байна. Мөн хашаа хороо, малын сараагаа ч цэвэрлэн айлчлан ирж буй жилээ угтан авдаг уламжлал өнөө ч оршин тогтносоор иржээ.
