“Түмэн тэмээний баяр” Өмнөговь аймагт амралтын өдрүүдэд болж өнгөрсөн. Энэ удаагийн баяр 25 дахь жилдээ болж буй бөгөөд энэ жилийнхийг "16 түмэн тэмээний баяр" нэрийн дор зохион байгуулагдсан юм.
“Түмэн тэмээний баяр"-т долоон аймгийн 20 гаруй сумын тэмээчин 400 гаруй тэмээтэйгээ, дотоодын 8500, гадаадын 120 гаруй жуулчин, зочид, төлөөлөгчид хүрэлцэн ирж оролцлоо. Баярын хүрээнд шилмэл ингэ, буур, тэмээтэй сайхан хос, ат, тайлаг, торомны уралдаан, богино зайн уралдаан, буухиа тэмцээн, тэмээн поло зэрэг уралдааныг зохион байгуулсан юм.
Энэ үеэр "Ингэний айргийн баяр-2024" үзэсгэлэн худалдааг гаргаж, 15 сумын үйлдвэрлэл эрхлэгчид, аж ахуйн нэгжүүд оролцон, нийт 202.5 сая төгрөгийн борлуулалт хийжээ.
НҮБ-аас 2024 оныг тэмээг хамгаалах олон улсын тэмээн овогтын жил болгон зарлаад байгаа юм. Монгол Улс 2023 онд 473 900 толгой тэмээ тоолуулснаас гуравны нэг нь Өмнөговь аймагт байна.
Дэлхий дээр нийт тэмээний 90 хувь ганц бөхт, 10 хувь хоёр бөхт тэмээ эзэлдэг. Тэгвэл дэлхийд ховор хоёр бөхт тэмээний цөм нь Монгол Улс бөгөөд улсынхаа хамгийн олон тэмээтэй нь Өмнөговь аймаг юм. Өмнөговь аймгийн тэмээн сүрэг 160 мянга буюу 16 түмд хүрсэн тул энэ жил тэмээний баяраа “16 Түмэн тэмээний баяр” хэмээн нэрийджээ.
