УИХ-ын гишүүн Ч.Хүрэлбаатарын санаачилсан “Хөрөнгө оруулалтын тухай хууль” Монгол Улсын тусгаар тогтнол, үндэсний аюулгүй байдалд заналхийлж байна гэж үзэх иргэд цөөнгүй байгаа бөгөөд уг хуулийн төслийг дэмжихгүй байгаагаа өөр өөрсдийн өнцгөөр илэрхийлсээр удаж байна.
Тэгвэл Иргэн Н.Номун-Эрдэнэ “Газрыг гадаадын иргэн 100 жилээр ашиглах, эзэмшихийг цуцлах” нийтийн өргөдлийг санаачлан “D-parliament” платформын нийтийн өргөдөл хүлээн авах “D-Өргөдөл” систем дээр 2024 оны 01 дүгээр сарын 23-ны өдөр үүсгэжээ. Тэгвэл 2024 оны 02 дугаар сарын 05-ны өдрийн 12 цагийн байдлаар уг өргөдлийг 100’132 иргэн дэмжиж санал өгсөн байна.
Монгол Улсын Их Хурлын тухай хуульд зааснаар “D-Өргөдөл” цахим системд иргэний гаргасан өргөдөл, санаачилга нь 33.000 иргэний гарын үсэг буюу дэмжлэгийг авсан тохиолдолд тодорхой асуудлаар ажлын хэсэг байгуулах, 70.000 иргэний гарын үсэг буюу дэмжлэгийг авсан тохиолдолд Байнгын хорооны эрхлэх асуудлын хүрээнд хяналт шалгалт явуулах, 100.000 иргэний гарын үсэг буюу дэмжлэгийг авсан тохиолдолд Улсын Их Хурлаар шийдвэрлүүлэх боломжтой юм.
Сануулахад УИХ-ын гишүүн Ч.Хүрэлбаатар санаачлан 2023 оны 6 дугаар сард өргөн барьсан “ХӨРӨНГӨ ОРУУЛАЛТЫН ТУХАЙ ХУУЛИЙН ШИНЭЧИЛСЭН НАЙРУУЛГЫН ТӨСӨЛ”-ийн Дөрөвдүгээр бүлэг /Хөрөнгө оруулалтын урамшуулал/-ийн 16 дугаар зүйл /Хөрөнгө оруулалтын татварын бус урамшуулал/-ийн 16.1.1 дэх хэсэгт “газрыг 15-60 хүртэл жилээр гэрээний үндсэн дээр ашиглуулах, уг хугацааг гэрээний анхны нөхцөлөөх нэг удаа 40 хүртэл жилээр сунгах” гэж тусгасан нь ийнхүү олон нийтийн бухимдлыг төрүүлээд байгаа билээ.
