Өсвөр насны хүүхдийн эрх, хамгаалал, эрүүл мэндийн зан үйлийн өнөөгийн байдлыг олон улсын түвшинд хүлээн зөвшөөрөгдсөн арга аргачлалын дагуу судлан, тогтоож, засгийн газрын бодлого, хөтөлбөрийн үр дүнг тодорхойлох, суурь мэдээллийг бий болгох зорилгоор НҮБ-ын Хүүхдийн Сан, ДЭМБ-ын санхүүгийн болон техникийн дэмжлэгтэйгээр Хөдөлмөр, Нийгмийн Хамгааллын Яам, Нийгмийн эрүүл мэндийн үндэсний төв, Боловсролын судалгааны үндэсний хүрээлэн хамтран “Боловсролын орчин дахь хүүхдийн эрх, хамгаалал, эрүүл мэндийн судалгаа”-г 2022-2023 онд хийж, үр дүнг танилцуулсан байна.
Судалгаагаар Ерөнхий боловсролын сургуулийн 13-17 насны
- 3 суралцагч тутмын 1 нь сургууль дээрээ дээрэлхэлтэд өртөж байсан;
- 4 суралцагч тутмын 1 нь сургуулийн орчинд аюулгүй байдал алдагдсан;
- Эмэгтэй 5 суралцагч тутмын 1, эрэгтэй 7 суралцагч тутмын нэг нь цахим дээрэлхэлтэд өртөж байсан;
- 5 суралцагч тутмын 1 нь гэрийнхэндээ туслах, дүүгээ харах, мал хариулах зэрэг шалтгааны улмаас сургуулиас гадуурх хөгжлийн үйл ажиллагаанд хамрагдаж чаддаггүй;
- 5 суралцагч туцтмын 3 нь хүүхдийн оролцоонд тулгуурлан зохион байгуулдаг үйл ажиллагаанд сүүлийн 12 сарын хугацаанд оролцоогүй;
- 10 суралцагч тутмын 1 нь сүүлийн 1 сард янжуур тамхи татсан;
- 4 суралцагч тутмын 1 нь сүүлийн 1 сард электрон тамхи татсан;
- 7 суралцагч тутмын 1 нь нэг ба түүнээс олон удаа согтож үзсэн;
- 10 суралцагч тутмын 1 нь сүүлийн 30 хоногт “НЭГ УУЛТ” хэмжээгээр архи, согтууруулах ундаа хэрэглэсэн; /Энэ үзүүлэлт хотын суралцагчдад хөдөөнийхөөс 2 дахин их байна/
- 2 суралцагч тутмын 1 нь өөрийнх нь асуудал, санаа зовнилыг эцэг, эх асран хамгаалагчид нь огт ойлгодоггүй гэжээ.
