Зуны цагийн хуваарьт шилжүүлдэг болох Засгийн газрын тогтоолын төсөлд яамдуудаас санал авч байгаа талаар мэдээлэл цацагдсан.
Энэ нь хавар цагийг нэг цагаар урагшлуулж, зуны цагийн тоололд шилжүүлнэ гэсэн үг юм. Харин намар нэг цагаар хойшлуулж, өвлийн цагийн хуваарьт шилждэг болно. Уг саналыг Засгийн газрын хэрэг эрхлэх газрын дарга Д.Амарбаясгалан санаачилсан бөгөөд яамдаас санал ирсний дараа Засгийн газрын хуралдаанд танилцуулж, шийдвэрлүүлэх юм. Ингэхдээ энэ сарын 24-25-нд шилжих шөнө зуны цагийн хуваарьт шилжүүлэх саналыг гаргасан байсан. Учир нь ерөнхий боловсролын сургуулийн сурагчдын II ээлжийн амралт гуравдугаар сарын 27-оос дөрөвдүгээр сарын 3-н хүртэл нэг 7 хоног үргэлжилнэ. Сурагчдын амралттай тааруулан зуны цагийн хуваарьт шилжүүлвэл хүүхдүүдийн биед үзүүлэх сөрөг нөлөө багасч, дасан зохицоно гэж үзэж байгаа аж.
Урт өвлийн улиралтай улсад нар мандах, шингэх цагийг харгалзан цагаа хөдөлгөж байх нь хөдөлмөрийн бүтээмж, эрчим хүчний хэмнэлт, эдийн засгийн ач холбогдолтой гэж үзэж байгаа аж.
БСШУ-ны сайд Л.Энх-Амгалан зуны цагийн хуваарьт шилжэх саналыг дэмжихгүй гэдгээ илэрхийлсэн. Тэрээр “Боловсролын хүрээлэнгээс өмнө хийсэн судалгаа бий. Хүүхдүүд одоо сэрж байгаа цагаасаа нэг цагаар эрт босно гэсэн үг шүү дээ. Энэ бага насны хүүхдүүд сөргөөр нөлөөлдөг гэсэн судалгааны дүн гарсан. Ялангуяа цэцэрлэг, бага ангийн хүүхдүүдийн бие, сэтгэл зүйд сөргөөр нөлөөлнө. Бүх сайд нараас цаг урагшуулах асуудлаар санал авна гэсэн. Би Боловсролын сайдын хувьд зөв шийдвэр биш гэж харж байна” гэсэн юм. Харин Эрүүл мэндийн сайд С.Чинзориг өөрийн байр сууриа илэрхийлэхээс татгалзсан бөгөөд саналаа бичгээр хүргүүлнэ гэдгээ мэдэгдсэн.
Өнөөдрийн Засгийн газрын хуралдаанаар тус асуудлыг хэлэлцэх байсан ч ЗГХЭГ-ын дарга Д.Амарбаясгалан Баян-Өлгий аймагт ажиллаж байгаа учраас ирэх 7 хоногийн хуралдаанд оруулахаар хойшлуулжээ.
Шилдэг боловсролын системтэй эхний 18 улсын 17 нь өвөл, зуны цагийн хуваарьт шилжүүлдэг байна. Япон шилжүүлдэггүй байна.
Цаг шилжүүлэх нь зөв үү, буруу юу?
