УИХ дахь МАН-ын бүлгийн хуралдаанаар хэлэлцсэн асуудлын талаар МАН-ын Бүлгийн дарга Д.Тогтохсүрэн мэдээлэл өглөө.
Хурлаар цаг үеийн нөхцөл байдлын талаар Ерөнхий сайд болон Хууль зүй, дотоод хэргийн сайдын мэдээлэл сонссон байна. Мөн Эрүүгийн хуулийн нэмэлт өөрчлөлтийн талаар Хууль зүйн байнгын хорооны даргын мэдээллийг сонсчээ. Тодруулбал Эрүүгийн болон Эрүүгийн хэрэг хянан шийдвэрлэх тухай хуулийг арванхоёрдугаар сарын 14-ний өдрийн Засгийн газрын хуралдаанаар оруулж, УИХ-д өргөн барих бөгөөд энэ долоо хоногт УИХ хэлэлцэх эсэхийг нь шийдэх юм байна. Эрүүгийн хуулийн 22 дугаар зүйлд байгаа ялыг чангатгахтай холбоотой асуудал. Үндэслэлгүй хөрөнгөжихтэй холбоотой асуудлыг мөн авч үзэх аж.
Мөн МАН-ын Бүлгийн дарга Д.Тогтохсүрэн хэлэхдээ цаашид байгалийн баялгийн төрийн өмчийн менежментийг сайжруулахтай холбоотой зүйл бий. Нэг удаа ийм зүйл боллоо гээд орхих биш цаашид тухайн асуудал гарахгүй байх эрх зүйн үндсийг бий болгох нь чухал байна. Төрийн болон орон нутгийн өмчийн тухай, Төрийн өмчийн компаниудын тухай, Уул уурхайн бүтээгдэхүүний биржийн тухай гэсэн гурван хуулийг энэ долоо хоногт УИХ хэлэлцэж, ирэх долоо хоногт батална. Ингэж байгалийн баялгийн менежментийн асуудлыг шийдэх нь зүйтэй гэж үзсэн. Үндэсний аюулгүй байдлын зөвлөл зөвлөмж гаргаад гэрээ хийдэг байдал манай улсад 10 гаруй жил үргэлжилсэн. Ерөнхий сайдаас санал тавьсны дагуу эрх зүйн орчныг сайжруулах тал дээр анхаарах хэрэгтэй. Уг асуудлыг хуулиар Засгийн газар, УИХ шийддэг байдал руу орох хэрэгтэй. Энэ төрлийн эрх зүйн орчныг бий болгоно" гэдгийг нэмж хэллээ.
