Өнөөдөр "Боомт, нүүрсний хулгайн асуудлыг Хянан шалгах түр хорооны дарга, УИХ-ын гишүүн Г.Ганболд мэдээлэл өглөө.
Тэрээр “Т.Дорж ханд гишүүн түр хорооны гишүүн мөн. Гэхдээ хуралд нэг ч удаа суугаагүй. Түр хороон дээр 44 их наяд төгрөгтэй холбоотой нүүрсний мөнгөн дүнтэй холбоотой зүйл нэг ч удаа яригдаагүй. Үүнийг С.Ганбаатар тэргүүтэй бүх гишүүд мэдэж байгаа. Гэтэл 44 их наяд төгрөгийн нүүрс хулгайд алдагдсан гэсэн мэдээллийг Т.Доржханд гишүүн нийгэмд гаргаж тавьсан. Өнөөдөр түр хороон дээр 2.5 сая тонн нүүрсний хулгайн нотлох баримт цуглуулах асуудал яригдаж байгаа. Харамсалтай нь иргэдийг жагсааж, ард түмнийг төртэй нь талхилцуулсан мэдээллийг Т.Доржханд гишүүн гаргаж тавьсан. Хэрвээ буруу мэдээлэл өгсөн бол өвлийн хүйтэнд жагсаж байгаа иргэд, эрүүл мэндийн хувьд эрсдэл хүлээж байгаа цагдаагийн албан хаагчдаас уучлалт хүсэх ёстой. Үнэн мэдээлэл юм бол ямар тооцоо судалгаагаар 44 их наяд төгрөгийн асуудлыг гаргаж ирснээ тайлбарлах ёстой” хэмээн мэдэгдлээ.
Үүнээс харахад УИХ-аас байгуулагдсан түр хорооны хуралд ганц ч удаа суугаагүй байж ямар тооцоо судалгаагүйгээр Т.Доржханд гишүүн худал мэдээлэл түгээж, олон нийтийг бухимдуулсан бололтой.
