УИХ-ын хаврын ээлжит чуулганы 2021 оны тавдугаар сарын 6-ны өдрийн хуралдаан эхэллээ. Сүхбаатарын талбайд өлсгөлөн зарлаж буй УИХ дахь Ардчилан намын бүлгийн гишүүд цагдаа хууль хүчний байгууллага УИХ-ын гишүүний бүрэн эрхэд халдаж буй талаар хэллээ. Тодруулбал өлсгөлөн зарлаж талбай дээр хоносон гишүүдийн нэг Ц.Туваан намынхаа дотоод зөрчлөөс болж үүссэн асуудлыг төрийн асуудал мэтээр чуулганы индэр дээрээс мэдээлэл хийж, УИХ-ын дарга Г.Занданшатараас хатуухан хариу сонсов.
УИХ-ын дарга Г.Занданшатар “УИХ бол хууль тогтоох, хуулийн хэрэгжилтийг хянан шалгах үндсэн чиг үүргийг хэрэгжүүлдэг байгууллага. Энэ хүрээнд УИХ-ын гишүүд хууль санаачлах, хянан шалгах бүрэн эрх нь байгаа. Харин УИХ-ын энэ индрийг буруугаар ашиглаж, намынхаа дотоод зөрчлийг төрийнх болгож дэвэргэж болохгүй. Өлсгөлөн зарлаж хуулийг зөрчүүлдэг, хууль дээдэлдэг ёсыг зөрчиж байгаа нь Үндсэн хууль зөрчиж байгаа үйлдэл. Хуулийг өөрсдийн явцуу эрх ашиг бусармаг үйлдэл, явуургүй санаархалдаа нийцүүлж болохгүй. АН-ын гишүүд үүнийг болих хэрэгтэй. Дотоод зөрчил хагарал тэмцлээ Монголын төрд халдааж, төрийн хууль зөрчихийг шаардаж, буруу зөрүү мэдээллээр ард түмнийг төөрөгдүүлж, эмх замбараагүй байдал руу түлхэхийг оролдож байгаа үйлдлээ нэн даруй зогсоохийг шаардаж байна. УИХ-ын индэр дээрээс ард түмнийг төөрөгдүүлж болохгүй. АН доторх эрх мэдлээ булаацалдаж албан тушаалын төлөө өлсгөлөн зарлаж байгаа асуудлаа дотооддоо шийдэж учраа ол. Танай намын дотоод зөрчлийг УИХ шийддэг байгууллага биш. Намынхаа дотоод зөрчил, бульхайгаа нам дотроо шийд.Энэ асуудлаа төрд нялзаагаад байх шаардлага байхгүй” гэлээ.
