Эрх баригч, Ази тивд ууган, 100 жилийн түүхтэй МАН, МАХН нэгдэж, Ерөнхийлөгчийн сонгуульд оролцох нь гэдэг мэдээлэл олон нийтэд цацагдаж эхэлсэн.
Энэ асуудалд талууд байр сууриа илэрхийлээгүй байсан ч өчигдөр МАХН-ын дарга Н.Энхбаяр MN25 дугаар суваг телевизийн “Ам нээвэл” нэвтрүүлэгт оролцохдоо өөрийн байр сууриа албан ёсоор илэрхийлжээ.
Тэрээр “Дарга бол солигддог. Тиймээс би энд нийлнэ нийлэхгүй гэж мэдэмхийрч суумааргүй байна. МАХН бол миний өмч, компани биш шүү дээ. Н.Энхбаяр, У.Хүрэлсүх хоёр ярьж сууж байгаад шийдчих асуудал биш. Намын анхан шатны байгууллагын дарга, гишүүд хуралдаж ард түмний санал асуулга явуулж олонх нь хоёр нам цаашдын том зорилтын төлөө 100 жилийн ойгоороо нэгдэх хэрэгтэй гэж үзвэл би энд юу ч гэж хэлээд нэмэргүй. Тиймээс энэ ярилцлагаар дамжуулан ард иргэдээ дэмжихийг уриалж байна” гэжээ.
